Жас кезіміздегі қара қасқа атты Қамбар батыр жайлы естіген әңгіме желісіндегі оқиғалар Арал аймағында, шын мәнісінде, болған-болмағанын бірде-бір тарихшыдан есіткен емеспіз. Десек те, Қамбар батыр дастанындағы оқиғалардың кей тұстары сипатталғанда жер және көл жағалауларына ұқсастық бар. Соған қарағанда, аңыз-әңгіменің тектен-тек шықпайтыны рас болар. Дастандағы ноғайлы жерінің бедері де осы өлкенің жер-суына бағдарлас тәрізді. Қалай болғанда да бүгінгі жас буын ұрпағымыз ата-бабамыз қалдырып кеткен, батырларымыз қорғаған жер үшін жырлаған жыр-дастандарды оқып, өз бойларына сіңіре білсе, олардан келешек Тәуелсіз еліміздің білікті де қайратты азаматтары шығатынына бек сенімдіміз.