Өзге тілдің бәрін біл, өз тіліңді құрметте демекші, тіл үйрену ешуақытта артықтық етпейді. Қазақ атамның осы сөзінің жаны бар секілді. Дәл қазір 6 сынып оқушысы болсам да, болашақта көп тілді меңгергім келеді. Көп адамнан «Сізге бірнеше тіл білу қажет пе?» деп сұрасаңыз, «жоқ» деп жалтарады. Қазіргі таңда шет тілін меңгермесеңіз де, қазақ тілді ресурстардың жеткілікті екенін айтады. Өкінішке орай, мұндай адамдар біз өмір сүріп отырған қоғамда бар. Меніңше, тілдің пайдасы туралы оны білмейтін емес, білетін адамнан сұрауымыз керек. Себебі қуырдақтың нағыз тіл үйірер дәмін оны татып көрген адам ғана бағалай алады. Мен ағылшын тілін белгілі бір дәрежеде білемін. Шетелдік азаматтармен еркін тілдесіп, түсінісуге қауқарым жетеді. Дәл қазір екінші тілді меңгеріп жатырмын. Француз тілінде - махаббат, неміс тілінде - қызмет, италия тілінде - құштарлық, ағылшын тілінде - бизнес, орыс тілінде кез келген тақырыпта әңгіме айта аламыз. Мен бұл тұста нақты айтсам да, шынайы мағынасын өздеріңіз де түсініп отырған шығарсыздар. Кітап бір тілден екінші тілге аударылған кезде, көп өзгеріске ұшырайды.Соның салдарынан көп адам оның құнарын байқамайды. Өзге тілді меңгеру арқылы сіз басқа әлемге енесіз. Оған басқаша көзқараспен қарайсыз. Әлемді басқа қырынан танудың қандай пайдасы бар? Біз өзгелердің мәдениетіндегі дүниені өзімізге сіңістіре аламыз емес пе? Осы күнге дейін түсінгенім ағылшын тілі асқан жиналық пен ұқыптылықты талап етеді. Адамның тұлғалық қасиеттерінің қалыптасуына көңіл бөледі. Мұны сөйлемнің кез келген жерінде бас әріппен жазылатын «мен» («І») есімдігінен байқауымызға болады. Әңгімелесу барысында өзге тілді қолданған сайын, өзгеше ойлай бастайсыз. XVIII-XIX ғасырда өмір сүрген италяндық полиглот Джузуппе Меццофанти 39 тілде еркін сөйлеген. Бір қызығы, ол ешуақытта Италиядан өзге елге саяхаттап көрмеген. Өлім жазасына кесілген қылмыскердің соңғы сөзін тыңдау үшін бір түнде жаңа тілді меңгеріп шыққан екен. Адамның қолынан келмейтін іс жоқ. Сіз де көп ұзамай бірнеше тілді меңгере аласыз. Бастысы, қалау екенін ұмытпаңыз!
Толығырақ: http://massaget.kz/okushyilarga/shyigarma/28767/
Материалды көшіріп басқанда Massaget.kz сайтына гиперсілтеме міндетті түрде қойылуы тиіс. Авторлық құқықты сақтаңыз